Allir rættarfundir eru almennir, um dómarin ikki hevur avgjørt annað. Almenningurin kann fylgja við í einum rættarmáli og vera tilstaðar í rættarhølinum – um áhoyrarapláss eru tøk.
Í størra rættarhølinum er pláss fyri í mesta lagið 18 áhoyrarum og í minna rættarhølinum er pláss fyri í mesta lagið 7 áhoyrarum. Ikki kann roknast við, at øll plássini altíð eru tøk.
Rættarlistin - sum er yvirlit yvir rættarfundirnar - er tøkur á heimasíðuni og annars á kunningarskermi í bíðirúminum.
Persónar undir 18 ár hava ikki atgongd til rættarfundirnar, uttan so at dómarin gevur loyvi til tess.
Til skúlaflokkar og størri bólkar:
Rættarhølini hava avmarkað pláss, og ikki kann roknast við, at øll plássini altíð eru tøk.
Tað kunnu vera avbjóðingar við at finna eitt mál, sum er egnað til flokkin og har tað passar við tímatalvuna hjá flokkinum. Revsimál verða eisini stundum avlýst ella útsett, eins og dómarin kann avgerða, at málið skal viðgerast fyri afturlatnum hurðum.
Størri bólkar og skúlaflokkar verða tí bidnir at seta seg í samband við Føroya rætt umvegis post@sorinskrivarin.fo, um teir hava í hyggju at vitja rættin. Á henda hátt kann vitjanin leggjast til rættis á skilabesta hátt.
Tilboð um vitjan í rættinum við sýning av filmi um eitt revsirættarmál og frágreiðing frá dómara:
Føroya rættur hevur í 2019 tikið upp ein film, sum á ein áhugaverdan og greiðan hátt vísir, hvussu eitt revsimál fer fram í Føroya rætti.
Skúlaflokkar og aðrir størri bólkar eru vælkomnir til eina vitjan, har filmurin verður sýndur. Í samband við slíka vitjan verða tit bjóðaði vælkomin av einum dómara, sum kann greiða frá rættinum og svara spurningum. Filmurin varir 30 minuttir.
Flokkar, sum eru áhugaðir í hesum tilboðið, verða bidnir um at seta seg í samband við Føroya rætt umvegis post@sorinskrivarin.fo